Cuento de Juan Rodriguez Pastor (1997)

Juan Rodríguez Pastor (1997)


La hija chica del demonio

Esto era qu’era una familia, qu’eran reyis o algu asín, genti de muchu poderíu. Pos resulta que no tenían hijus y dambus a dos, el maríu y la su mujel estaban desesperaítus, y dicían:
-¿Quién v’a cudial de nusotrus cuando mos queemus viejitus?
De mo que jizun una romería a un santu d’esus santus milagrerus pa pidil que jueran escapá de tenel un hiju, manque juera feu y to. Aluegu que ya se van pa la su casa, pos el santu milagreru se le apaeci, y va y le dici a los reyis:
-Sos voy a dal albelía pa tenel un hiju. Peru solitu solitu sos pidu una cosa.
-Usté dirá, señol santu.
Y el santu:
-Pos solu sos pidu que cuandu el niñu que tengáis jaga los deciochu añus se tieni que dil de a casa pa sirvil una temporá al demoniu. Si no lo jaci d’esa manera sos morís los tres d’un soponciu misereri.
En de que nació el niñu y se jizu grandi, se tuvu que dil a sirvil al demoniu. Y dicía el mozu:
-Pero es que yo no sé andi está el demoniu pa jaceli de criáu.
¡Toma!, que los padris tampocu tenían conocencia d’andi estaría el demoniu esi. Antonci jicieron llamal a una bruja que sabía to lo que pasaba en el mundu.

Antoncis van los padris y le preguntan a la bruja:

-¿Andi está el demonio? Qu’es que tieni que dil el nuestru hiju a sirvirlu una temporá.

La bruja era verdá que lo sabía to, pero to de to, y dicía la bruja:

-Tenéis que ponerli al vuestru mozu unus borceguinis de jierru y que se ponga de caminu andandu. Y allí andi se gastín los borceguinis, que ya le salga un poquinu de pelleju del pié por abaju, allí es el sitiu del demonio.
Ya s’encasqueta los borceguinis y s’echa a los jombrus unas alforjas, y, ¡hala!, a recorrel mundu. Veng’andal leguas y más leguas, y más leguas entovía, y los borceguinis que no se gastaban na de na. Hasta que un día sintió en el deu gordu del pie como que se pinchaba con un chinarru, y era que ya s’había gastáu el borceguín. Antoncis alzó la mola y se guipo mu p’alla en un monti com’un palaciu mu grandoti, y dicía el mozu:
-Voy p’allá, que seguritu qu’esi palaciu es el del demoniu.
Pa llegal p’al palaciu tenía que pasal al lau d’un ríu. Y el mozu sintió en el ríu muchu alborotu y antoncis s’escondió detrá d’un galaperu pa guipal lo que pasaba. Pos era que s’estaban bañandu las tres hijas del demonio, que una era mu guapa y las otras dos eran mu feas. La más chica era la más guapa. Pos como tamién era la más lista, las otras le tenían envidia y l’habían atáu una moleña a una pata y l’habían tiráu pa lo más jondu. Cuando la tirarun s’echarun al chapescu.
Antoncis el mozu se tiró p’al jondón y la sacó mediu muerta, que ya jacía gorgoritu.
Comu estaba esnúa cuando la sacó del agua, vio que tenía un lunal en el muslu derechu.
Aluego le dio la capa pa que s’enrebujara, porque las otras dos l’habían quitáu la ropa y to. Y le diju que iba de caminu pa servil al demonio. Antoncis la hija chica del demonio le dici:
-El demoniu es el mi padri y va a jacel los posibilis pa jacerti el su esclavu toa la vida. Pa esu te mandará tres cosas que naidi pueda ser escapa de jacerlas. Comu fallis en alguna, ya estás perdíu. Asina que cuando te mandi esu, tu vas y me llamas pa que venga en la tu ayúa. Pa esu namás tienis que dicil: Moza del lunal, acúi a mí, que me tienis que ayual.
Pos ya que llegó al palaciu, va y dici:
-Güenus días mos de Dio.
Y le dici el demoniu:
-Pos güenus días. ¡Conque tú eris el ayuanti que me va sirvil! Pos güenu, agora descansa que aluegu te voy a dal un trabaju de mandiquitali. Y comu no me lo jagas te vas a queal de críáu de mí
pa insecula seculorun.
Y va el mozu:
-Usté dirá, señol demoniu.
Y antoncis el demoniu le dio un azaón y le diju que a la media nochi tenía que empezal a rozal un monti que tenía enfrentitu del palaciu. Y esi monti era un monti de sieti leguas. Peru no
solitamenti tenía que rozalu; es que tamién tenía que dejalu llanitu del to. Y que tenía que estal to jechitu cuando l’amanecía, a la salía del sol. Y le dicía el demoniu:
-Como no lo habíis to a la salía del sol, ya sabis lo que t’aguarda: criáu de mí pa los inséculas seculorum.
Ya que se jue el mozu to moquicaíu y se metió en un cuartu oscuru, qu’era el que le dejó el demoniu pa que descansara hasta que llegara la media nochi. Antonis el probi s’acordó de lo que le diju la hija del demonio, qu’era que cuandu estuviera en necesiá pos que la llamara. Asina que el mozu al estanti:
- Moza del lunal, acúi a mí, que me tienis que ayual.
La hija del demoniu se presentó en un bervi. Le diju la hija del demoniu:
-¿Qué t’ha mandáu mi padri?
Y el mozu:
-Pos mira, m’ha mandáu que tengu que rozal y allanal un monti de sieti leguas. Y esu tengu que jacerlu entre la media nochi y la amanecía.
Y le decía la hija del demoniu:
-No ties que procuparti. Agora duérmiti hasta que yo venga a despertarti.
De mo qu’el mozu se quedó más dormíu c’un lirón. Y por la mañana jue la hija del demoniu y lo dispertó, qu’estaba bien dormiítu el probi. Y le diju:
-Anda, levántati y acúi andi el mi padri, c’antovía no s’ha levantáu. Y le dicis que s’ansomi al correol que la faena está jechita.
Así que jue. Aluego qu’el demoniu vio el monti llanitu y to, va y le dici:
-¡Anda coño! Agora va a resultar que tú eris tan demoniu comu yo. O es que alguna hija mia t’ayuó.
Claritu qu’el demoniu no s’ib’a rindil. Y jue y le diju:
-Esta vez m’has jechu bien la faena. Pero agora te diré. Pos ya que tienis llanitu el monti, lo tienis que plantal de olivus, le tienis que cogel las acetunas, las tienis que lleval a la prensa y me tienis que trael un pringá frita en el aceiti que saquis. ¿Entendíu? Pero agora vieni lo güenu, y es que tó tieni que sel entre la media nochi y la salía del sol.
Otra ve que se va el mozu al cuartu. Y to igualitu c’antis, qu’era llamal a la hija del demonii:
-Moza del lunal, acúi a mí, que me tienis que ayual.
De que llegó la hija del demoniu, pos ya le contó lo que pasaba. Y la hija del demoniu, pos igualitu que aninanti:
-No ties que procuparti. Agora duérmite hasta que yo venga a despertarti.
Y asina jue. De que llegó la amanecía, llegó la hija del demoniu pa despertailu. Le dicía:
-Vaiti andi el mi padri y que s’ansomi al correol. Qu’está to jechitu. Y le llevás esta pringá, qu’está jecha la fritura con l’aceiti de las acetunas de los olivus.
Ya qu’el demoniu se zampó la pringá y vio to el olival, pos dicía:
-Agora va a resultar que tú eris tan demoniu comu yo. O es que alguna hija mia t’ayuó.
La cosa es qu’el demoniu se dio por vencíu. Y le diju que ya podía dilsi, que y’había cumplíu el trabajitu y que podía dilsi. Peru antis de dilsi tenía qu’escogel a una de las sus tres hijas pa casalsi con ella. Y el mozu, pos claru:
-¿Y cómu conozu yo a la que tengu qu’escogel.
¡Toma!, que no era bobitu el mozu, porque el lo que quería era cogel a la hija chicha, porque la conocía y era mu guapa, y es que tamién lo ayuó. Pero es qu’el demoniu no sabía na de to esu. Y
el demoniu:
-Mira: te metis en esi cuartu, que tieni una puerta y una cortina. Aluegu toas tres van a metel la pata por la cortina, y la de la pata que elijas, con esa te casas.
El se metió p’adrentu y toas tres metierun la pata por la cortina. Antoncis jue y l’arremangó la jalda hasta el muslu, porque lo que quería era averigual la que tenía el luna en el muslu. Ya que lo
vio, dici:
-Con ésta me queu.
Asina que jicieron la boa en el mismu día, to con un guisopazu de agua con una escoba. Aluegu ya s’acostarun y le dici la hija del demonio al su maríu, que comu ya estaban casáus el mozu era el su maríu:
-Estaiti dispiertu, que de siguru que el mi padri mos v’a querel matal esta mesma nochi, a la media nochi.
Ya al pocu ratu, tron, tron, en la puerta. Y la hija:
-¿Quién llama?
Y el padri:
¿No sos dormiis?
Lo que quería era que se quearan dormíus pa entral y cortali el güiru. Asina que dispiertu. Y otra ve: tron, tron. Y la hija otra ve:
¿Quién llama?
Y el padri:
-¿No sos dormíis, qu’es mu tardi?
Peru, claru, ya empezaban a pegal cabezas, qu’es que se jacía mu tardi, y la hija del demoniu:
-Amus, maríu; amus a ilmus por la ventana, porque si nos descuidiamus mos queamus dormíu y entra el mi padri y mos corta el güiru.
De mo que antis d’escapalsi cogierun dos almohás y las arroparun bien arropaitas, que paecieran qu’eran ellus. Y al pocu ratu: tron, tron. Pero allí no contestaba naidi. Asina qu’entró el demoniu mu despacininu y to ascura, y jue y le clavó el cuchillu a las almohás. Aluegu salió pa juera y empezó:
-¡Hijas, acuyil! ¡Venil a vel cómu m’escachináu al la güestra hermana y al güestru cuñáu!
Ya que entrarun tos contentitus el demoniu, las sus hijas y la su mujel, y pol poquitu no le dio un soponciu cuandu vio que no eran ellus, y que lo que había agujereáu eran las almohás. Y
empezó a pegal chillíus:
-¡Estu no se quea asina! ¡Estu no se quea asina!
Antoncis salió corriendo p’al corral pa cogel un caballu. El demoniu tenía en el corral dos
caballus: unu era el caballo del vientu y el desotru era el caballu del pensamientu. El del pensamientu era el que más corría, y esu qu’estaba to sequinu, que le se vían hasta lo morillus.
Asina que la hija comu lo sabía pos se montarun en el caballu del pensamientu y se salierun al chapescu. De mo que el demoniu no pudu siguirlus polqui solitu queaba el caballu del vientu y se queó con el rabinu entre las patas.
Ya que llegarun a la casa del mozu, pos los recibierun los reyis. Y aluegu ya se casarun y esu, y jueron felicis.


Y colorín, colorau, comu tieni que sel,
pa vusotrus el pan y pa mi la miel.